ദിനാചരണങ്ങളല്ല സംസ്‌കാരമാണ്‌ ആവശ്യം

ജിദ്ദ ഇന്ത്യന്‍ ഇസ്‌ലാഹി സെന്ററില്‍ നല്‍കിയ സ്വീകരണചടങ്ങില്‍ ഡോ. ജമാലുദ്ദീന്‍ ഫാറൂഖി പ്രസംഗിക്കുന്നു

ജിദ്ദ: മതം പഠിപ്പിച്ച ദര്‍ശനങ്ങളിലേക്ക്‌ തിരിച്ചുപോകുന്നതിനുളള ആഹ്വാനങ്ങളാണ്‌ പല ദിനാചരണങ്ങളുടെയും പിറകിലെ യഥാര്‍ത്‌ഥ സന്ദേശമെന്ന്‌ കേരള ജംഇയ്യത്തുല്‍ ഉലമ ജനറല്‍ സെക്രട്ടറി ഡോ. ജമാലുദ്ദീന്‍ ഫാറൂഖി അഭിപ്രായപ്പെട്ടു. ജിദ്ദ ഇന്ത്യന്‍ ഇസ്‌ലാഹി സെന്ററില്‍ നല്‍കിയ സ്വീകരണചടങ്ങില്‍ പങ്കെടുത്ത്‌ സംസാരിക്കുകയായിരുന്നു അദ്ദേഹം. ലോക മുലയൂട്ടല്‍ ദിനം, മാത്യ ദിനം, വ്യദ്ധദിനം, എയിഡ്‌സ്‌ ദിനം തുടങ്ങി ആധുനിക ലോകം ഇന്നാചരിക്കുന്ന പല ദിനാചരണങ്ങളും ആവശ്യമായി വന്നത്‌ മതദര്‍ശനങ്ങളെ തളളിക്കളഞ്ഞതുകൊണ്ടാണെന്ന്‌ മനസ്സിലാക്കാന്‍ പറ്റും. ഒരു ദിവസം മാത്രം ഓര്‍ത്തിരിക്കേണ്ട സന്ദേശങ്ങളല്ല അവയെന്നും ജീവിതത്തിലുടനീളം പാലിക്കേണ്ട മതകല്‌പനകളാണെന്നും സമൂഹം മനസ്സിലാക്കേണ്ടതുണ്ട്‌. പ്രക്യതിയോടും അതിന്റെ ജൈവവ്യവസ്‌ഥകളോടും ഏറെ ഇണക്കമുളള ഒരു ജീവിത രീതിയാണ്‌ ഇസ്‌ലാം വിഭാവന ചെയ്യുന്നതെന്നും ഡോ. ഫാറൂഖി പറഞ്ഞു.

ചടങ്ങില്‍ വയനാട്‌ ജില്ല കെ.എന്‍.എം സെക്രട്ടറി കെ.പി. അഹമ്മദ്‌, നജ്‌റാന്‍ ഇസ്‌ലാഹി സെന്റര്‍ പ്രഡിഡണ്ട്‌ അബ്‌ദുല്ലത്തീഫ്‌ കോടരേി എന്നിവര്‍ പങ്കെടുത്തു. ഇസ്‌ലാഹി സെന്റര്‍ പ്രസിഡണ്ട്‌ മൂസക്കോയ പുളിക്കല്‍ അധ്യക്ഷത വഹിച്ച യോഗത്തില്‍ നൗഷാദ്‌ കരിങ്ങനാട്‌ സ്വാഗതവും സലീം ഐക്കരപ്പടി നന്ദിയും പറഞ്ഞു.