ദോഹ: ഈ വരുന്ന വ്യാഴം, വെള്ളി ദിവസങ്ങളില്‍ മുൻ‍തസയിലെ അബൂബക്കര്‍ സിദ്ദീഖ് ഇന്‍ഡിപെൻ‍ഡന്റ് സ്‌കൂളിൽ നടക്കുന്ന ആറാം ഖത്തർ മലയാളി സമ്മേളനത്തിന്റെ ഒരുക്കങ്ങൾ പൂർത്തിയായതായി സംഘാടക സമിതി ഭാരവാഹികൾ അറിയിച്ചു. ഖത്തർ ഇന്ത്യൻ ഇസ്‌ലാഹീ സെന്ററിന്റെ നേതൃത്വത്തിൽ ഖത്തർ മതകാര്യ വകുപ്പിന്റെ കീഴിലുള്ള ഫനാറിന്റെയും ഖത്തറിലെ വിവിധ മലയാളി സംഘടനകളുടെയും സഹകരണത്തോടെ നടക്കുന്ന സമ്മേളനത്തിന് വ്യാഴാഴ്ച വൈകുന്നേരം അഞ്ച് മണിക്ക് തുടക്കം കുറിക്കും.
ഒമ്പത് സെഷനുകളായി നടക്കുന്ന സമ്മേളനത്തിൽ എം പിമാരും എം എൽ എമാരും ഖത്തറിലെ വിവിധ മന്ത്രാലയ പ്രതിനിധികളും മത സാംസ്‌കാരിക രംഗത്തെ പ്രഗത്ഭരും പങ്കെടുക്കും.
വ്യാഴാഴ്ച നടക്കുന്ന ഉദ്ഘാടന സമ്മേളനത്തിൽ കെ. സുധാകരൻ എം.പി, പ്രമുഖ ചരിത്രകാരൻ ഡോ. കെ. എൻ. പണിക്കർ തുടങ്ങിയവർ സംബന്ധിക്കും. കെ.പി. അബ്ദുൽ ഹമീദ് അധ്യക്ഷത വഹിക്കുന്ന ഉദ്ഘാടന സെഷനിൽ സമ്മേളന സുവനീർ കെ.എൻ.എം സംസ്ഥാന പ്രസിഡണ്ട് ഡോ. ഇ.കെ. അഹ്മദ് കുട്ടി ഐ.സി.സി. പ്രസിഡണ്ട് കെ.എം. വർ‍ഗീസിന് നല്കി പ്രകാശനം ചെയ്യും. ഐ.എസ്.എം ജനറൽ സെക്രട്ടറി എൻ. എം. അബ്ദുൽ ജലീൽ പ്രമേയ വിശദീകരണം നടത്തും.
വൈകുന്നേരം ഏഴ് മണിക്ക് നടക്കുന്ന വനിതാ സംഗമം ഖത്തർ മന്ത്രാലയ പ്രതിനിധി ഉദ്ഘാടനം ചെയ്യും. അഡ്വക്കറ്റ് ശബീന മൊയ്തീൻ അദ്ധ്യക്ഷത വഹിക്കുന്ന സംഗമത്തിൽ പ്രശസ്ത എഴുത്തുകാരി കെ.പി. സുധീര, ഐ.സി.സി. വൈസ് പ്രസിഡണ്ട് ആനി വർ‍ഗ്ഗീസ്, ജമീല ടീച്ചർ എടവണ്ണ, ജയശ്രീ മേനോൻ തുടങ്ങിയവർ പ്രസംഗിക്കും. വേദി രണ്ടിൽ നടക്കുന്ന സംഘടനാ പ്രതിനിധി സമ്മേളനത്തിൽ പ്രവാസികൾ നാട്ടിലും ഗൾ‍ഫിലും അനുഭവിക്കുന്ന പ്രശ്‌നങ്ങൾ ചർ‍ച്ച ചെയ്യും. കെ. സുധാകരൻ എം.പി, കെ.എം. ഷാജി എം.എൽ.എ, കെ.എൻ. പണിക്കർ എന്നിവർ പങ്കെടുക്കും. സമ്മേളനത്തിൽ പങ്കെടുക്കുന്ന ജനപ്രതിനിധികൾ‍ക്ക് ദോഹയിലെ പ്രവാസി സംഘടനകൾ നല്കുന്ന നിവേദനങ്ങൾ‍ക്ക് അന്തിമ രൂപം നൽ‍കും. സംഘടനാ നേതാക്കൾ‍ക്കായി നേതൃപരിശീലന ശില്പശാലയും നടക്കും.
വനിതാ സമ്മേളനത്തിന് സമാന്തരമായി വേദി മൂന്നില്‍ നടക്കുന്ന ബാലസമ്മേളനത്തിന് അബ്ദുല്ലത്തീഫ് പുല്ലൂക്കര, ജംഷീർ ഐക്കരപ്പടി തുടങ്ങിയവർ നേതൃത്വം നല്‍കും. കുരുന്നുകളുടെ വിവിധ കലാപരിപാടികൾ അരങ്ങേറും.
നവംബർ പതിനെട്ട് വെള്ളിയാഴ്ച്ച രാവിലെ എട്ട് മണിക്ക് ആരംഭിക്കുന്ന പഠന സെഷനിൽ പ്രമുഖ എഴുത്തുകാരൻ മുജീബ്‌റഹ്മാൻ കിനാലൂർ, ഐ.എസ്.എം സംസ്ഥാന ജനറൽ സെക്രട്ടറി എൻ.എം. അബ്ദുൽ ജലീൽ തുടങ്ങിയവർ പങ്കെടുക്കും. ഉച്ചക്ക് ഒരു മണിക്ക് 'സാംസ്‌കാരികാധിനിവേശവും മാധ്യമങ്ങളും' എന്ന വിഷയത്തിലുള്ള സെമിനാർ എഴുത്തുകാരൻ സക്കറിയ ഉദ്ഘാടനം ചെയ്യും. അശ്‌റഫ് കടയ്ക്കൽ, മുജീബ് റഹ്മാന്‍ കിനാലൂർ എന്നിവർ പ്രഭാഷണം നടത്തും. വേദി മൂന്നിൽ നടക്കുന്ന വിദ്യാർഥി സമ്മേളനത്തിന് എം.എസ്.എം സംസ്ഥാന ജനറൽ സെക്രട്ടറി അൻ‍ഫസ് നന്മണ്ട നേതൃത്വം നല്‍കും.
ഉച്ചക്ക് ശേഷം 3.15 ന് നടക്കുന്ന യുവജന സംഗമത്തിൽ 'അഴിമതി രഹിത പൊതുപ്രവർ‍ത്തനം സാധ്യമാണോ?' എന്ന വിഷയത്തിൽ ചർ‍ച്ച നടക്കും. ഖത്തർ പ്രധാനമന്ത്രിയുടെ സ്‌പെഷ്യൽ ഉപദേഷ്ടാവും മജ്‌ലുസുശ്ശൂറ അംഗവുമായ യൂസുഫ് റാശിദ് അൽ‍ഖാതിർ സെഷൻ ഉദ്ഘാടനം ചെയ്യും. പബ്‌ളിക് ഹെൽ‍ത്ത് ഡയറക്ടർ ഡോ.ശൈഖ്.മുഹമ്മദ് അൽ‍താനി മുഖ്യാതിഥിയായി പങ്കെടുക്കും. ഖത്തർ റെയിൽ‍വേ കമ്പനിയുടെ മാനേജിംഗ് ഡയറക്ടർ അബ്ദുല്ല അൽ സുബയ്യ്, ബ്രിഗാഡിയർ. സാലിഹ് അൽ‍ഖുബൈസി, പി.സി. വിഷ്ണുനാഥ് എം.എൽ.എ, കെ.എം. ഷാജി എം.എൽ.എ, ഡോ. സെബാസ്റ്റ്യൻ പോൾ, എം.എസ്.എം സംസ്ഥാന പ്രസിഡണ്ട് ആസിഫലി കണ്ണൂർ എന്നിവർ പങ്കെടുക്കും.
വൈകിട്ട് ആറ് മണിക്ക് നടക്കുന്ന സമാപന സമ്മേളനം ഖത്തർ മന്ത്രാലയ പ്രതിനിധി ഉദ്ഘാടനം ചെയ്യും. ഇന്ത്യൻ അമ്പാസഡർ ദീപാ ഗോപാലൻ വാദ്വ, ഗവ. ചീഫ് വിപ്പ് പി.സി. ജോർ‍ജ്ജ്, പത്മശ്രീ എം.എ. യൂസുഫലി, ഡോ. സൈഫ് അൽ‍ഹജരി, ഫനാർ ഡയറക്റ്റർ ശൈഖ് അബ്ദുല്ല അൽ‍മുല്ല, റാഫ് ഡയറക്റ്റർ ശൈഖ് ആഇദ് ഖഹ്ത്വാനി, ശൈഖ് ഖാലിദ് ഫഖ്‌റു (ഖത്തർ ചാരിറ്റി), ഇന്ത്യൻ ഇസ്ലാഹി മൂവ്‌മെന്റ് ജ.സെക്രട്ടറി ഡോ. ഹുസൈൻ മടവൂർ, കെ.ടി. റബീഉല്ല തുടങ്ങിയവർ സംബന്ധിക്കും. സമ്മേളനത്തിന്റെ ഉപഹാരമായ വ്യക്കരോഗം മുൻ‍കൂട്ടി കണ്ടുപിടിക്കുവാനുതകുന്ന മൊബൈൽ ഡയഗ്‌നോസിസ് യൂണിറ്റുകളുടെ കൈമാറ്റവും സമാപനസെഷനിൽ നടക്കും.
സമ്മേളനത്തിലെ പ്രതിനിധികളായി അയ്യായിരത്തോളം ആളുകൾ റജിസ്റ്റർ ചെയ്തു കഴിഞ്ഞു. ആയിരത്തോളം ആളുകൾ‍ക്ക് ഒന്നിച്ച് ഭക്ഷണം കഴിക്കാനുളള സൗകര്യം, കുട്ടികൾ‍ക്കായി കളിസ്ഥലം, സമ്മേളനത്തിന്റെ തത്‍സമയ സംപ്രേഷണത്തിനുളള സംവിധാനം (www.malayaliconference.com), ബുക്ക്‌സ്റ്റാള്‍, ഹെൽ‍പ്പ് ഡെസ്‌ക് എന്നിവ സമ്മേളനനഗരിയിൽ ക്രമീകരിച്ചിട്ടുണ്ട്. വിവിധ ഗൽ‍ഫ് രാജ്യങ്ങളിൽ നിന്ന് സമ്മേളനം വീക്ഷിക്കാൻ പ്രതിനിധികൾ എത്തിച്ചേരും.
വാർ‍ത്താ സമ്മേളനത്തിൽ മുഖ്യരക്ഷാധികാരി കെ.പി. അബ്ദുൽ‍ഹമീദ്, രക്ഷാധികാരികളായ ഡോ. മോഹൻ‍തോമസ്, എ.കെ. ഉസ്മാൻ, ഡോ.വണ്ടൂർ അബൂബക്കർ, ചെയർ‍മാൻ കെ.എൻ. സുലൈമാൻ മദനി, ജനറൽ കൺ‍‌വീനർ ഹുസൈൻ മുഹമ്മദ്, ഫൈനാൻ‍സ് ചെയർ‍മാൻ മുഹമ്മദ് ഈസ, മീഡിയ ചെയർ‍മാൻ പി.എൻ. ബാബുരാജൻ, ഖത്തർ ഇന്ത്യൻ ഇസ്‌ലാഹീ സെന്റർ ജനറൽ സെക്രട്ടറി അബ്ദുല്ലത്തീഫ് നല്ലളം സംബന്ധിച്ചു.
