ദോഹ: അറബിഭാഷ പഠിക്കുന്നതോടൊപ്പംതന്നെ ആധുനിക ശാസ്ത്ര-സാങ്കേതിക പഠനത്തിലും മികവ് പുലര്‍ത്താനാണ് ഇക്കാലത്തെ വിദ്യാര്‍ഥികള്‍ ശ്രദ്ധ പുലര്‍ത്തേണ്ടതെന്ന് റൗളത്തുല്‍ ഉലൂം അറബിക് കോളേജ് പ്രിന്‍സിപ്പല്‍ ഡോ. ഹുസൈന്‍ മടവൂര്‍ പറഞ്ഞു. ഖത്തറിലെ ആര്‍.യു.എ. കോളേജ് പൂര്‍വ വിദ്യാര്‍ഥികളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. ഫാറൂഖ് കോളേജ് കാമ്പസിന്റെ മാതൃസ്ഥാപനമായ റൗളത്തുല്‍ ഉലൂം അറബിക് കോളേജ് ഇന്നും വലിയ സംഭാവനകളാണ് സമൂഹത്തിന് നല്‍കുന്നത്.
കോളേജിന് ലഭിച്ച യു.ജി.സി. അംഗീകാരം, വിദേശത്തുനിന്ന് ഉന്നതപഠനം കരസ്ഥമാക്കിയ നിപുണരായ അധ്യാപകരുടെ സാന്നിധ്യം, നെറ്റ് പരീക്ഷയ്ക്ക് വേണ്ടി ഉന്നത ബിരുദപഠന വിദ്യാര്‍ഥികള്‍ക്ക് പരിശീലനം നല്‍കുക എന്നിവ റൗളത്തുല്‍ ഉലൂം അറബിക് കോളേജിനെ വ്യതിരിക്തമാക്കുന്നു. അറബിക് കോളേജുകള്‍ വിദഗ്ധരായ നിരവധിപേരെയാണ് വാര്‍ത്തെടുക്കുന്നത്.
പഠനരംഗത്ത് മികവ് പുലര്‍ത്തുന്ന വിദ്യാര്‍ഥികളെ ഉന്നത പഠനത്തിന് പരിശീലനം നല്കി വിദേശ നാടുകളിലടക്കം പഠിക്കുന്നതിന് അവസരമൊരുക്കുന്നത് വിദ്യാര്‍ഥികളെ സംതൃപ്തരാക്കുന്നു. വിദഗ്ധരായ ആളുകളെയാണ് ഇന്നത്തെ ലോകം ആവശ്യപ്പെടുന്നത്. അറബിഭാഷ പഠിച്ച ഒരാളുടെയും ജീവിതത്തില്‍ ജോലി കിട്ടാത്ത അവസ്ഥ ഉണ്ടായതായി ഇതുവരെ കേള്‍ക്കാന്‍ സാധിച്ചിട്ടില്ലെന്നും അദ്ദേഹം കൂട്ടിച്ചേര്‍ത്തു.
പഠിച്ച അറിവ് വികസിപ്പിക്കുന്നതിന് പൂര്‍വ വിദ്യാര്‍ഥികള്‍ ശ്രദ്ധപുലര്‍ത്തണമെന്ന് പ്രമുഖ പണ്ഡിതന്‍ അബ്ദുള്‍ ഗഫൂര്‍ ഫാറൂഖി പറഞ്ഞു. നൂതന സാങ്കേതികവിദ്യ ഉപയോഗിച്ച് ആധുനികമായ ഭാഷാശൈലികളും പദങ്ങളും പ്രചരിപ്പിക്കുന്നതില്‍ പ്രവാസികളായ പൂര്‍വ വിദ്യാര്‍ഥികള്‍ ശ്രദ്ധ പുലര്‍ത്തണമെന്നും ഏകദേശം ഇരുപത്തിഅഞ്ചിലധികം വരുന്ന പൂര്‍വ വിദ്യാര്‍ഥികള്‍ക്ക് ഖത്തറില്‍ നിന്നുകൊണ്ട് ഒരു പാട് ചെയ്യാന്‍ കഴിയുമെന്നും അദ്ദേഹം കൂട്ടിച്ചേര്‍ത്തു.
2010 ലാണ് ആര്‍.യു.എ. കോളേജ് പൂര്‍വവിദ്യാര്‍ഥികള്‍ക്കായി ഒരു കൂട്ടായ്മ രൂപവത്കരിച്ചത്. പരിപാടിയില്‍ അബൂബക്കര്‍ ഫാറൂഖി അധ്യക്ഷത വഹിച്ചു. മജീദ് ഫാറൂഖി നാദാപുരം, സലീം മാസ്റ്റര്‍, യഅ്ഖുബ് കൊയ്‌ലോത്ത് എന്നിവര്‍ സംസാരിച്ചു. ഹമദ് തിക്കോടി സ്വാഗതവും അഫ്‌സല്‍ മടവൂര്‍ നന്ദിയും പറഞ്ഞു.
കൂടുതല്‍ വിവരങ്ങള്‍ക്ക് 33254647, 55345106 എന്നീ നമ്പറുകളില്‍ ബന്ധപ്പെടാവുന്നതാണെന്നും കമ്മിറ്റി അറിയിച്ചു.
