കാന്‍സര്‍ ബോധവത്കരണം വ്യാപകമാക്കണം

മനാമ: കാന്‍സര്‍ ബോധവത്കരണ പരിപാടികള്‍ സംഘടിപ്പിക്കുന്നതില്‍ ഇന്ത്യന്‍ സമൂഹം പുറകിലാണെന്ന് ഇന്ത്യന്‍ എംബസി ഫസ്റ്റ് സെക്രട്ടറി എ.അജയ്കുമാര്‍ അഭിപ്രായപ്പെട്ടു. ഇന്ത്യന്‍ ഇസ്‌ലാഹി സെന്ററും ബഹ്‌റൈന്‍ കാന്‍സര്‍ സൊസൈറ്റിയും സംയുക്തമായി സംഘടിപ്പിച്ച കാന്‍സര്‍ ബോധവത്കരണ ക്ലാസും ശില്പശാലയും ഉദ്ഘാടനം ചെയ്യുകയായിരുന്നു അദ്ദേഹം. മറ്റ് രാജ്യക്കാര്‍ പ്രത്യേകിച്ച് യൂറോപ്പിലെ ആളുകള്‍ക്കിടയില്‍ നടക്കുന്നത്ര ബോധവത്കരണ പരിപാടികള്‍ ഇന്ത്യക്കാര്‍ക്കിടയില്‍ കാണുന്നില്ല. പെരുപ്പിച്ച്് കാണിക്കേണ്ട ആവശ്യമില്ലാത്തത്ര പ്രാധാന്യം ഇത്തരം ബോധവത്കരണ പരിപാടികള്‍ക്കുണ്ടെന്നും ഇന്ത്യന്‍ സമൂഹത്തില്‍ അത് വ്യാപകമാക്കണമെന്നും അദ്ദേഹം പറഞ്ഞു.

പ്രോഗ്രാം കമ്മിറ്റി ചെയര്‍മാന്‍ എന്‍.ശശികുമാര്‍, ഹാഷിഫ് മുഹമ്മദ് അധ്യക്ഷത വഹിച്ചു. ഡോ. ഷൈന്‍ മേരി ക്ലാസെടുത്തു. നഴ്‌സുമാരായ അന്നമ്മ, കുഞ്ഞുമോള്‍, ശോശാമ്മ എന്നിവര്‍ ഡോക്ടര്‍ക്കൊപ്പം സ്തനാര്‍ബുദ ശില്പശാലക്ക് നേതൃത്വം നല്‍കി. ഇസ്‌ലാഹി സെന്റര്‍ കോ-ഓര്‍ഡിനേറ്റര്‍ എന്‍.റിയാസ് സ്വാഗതവും നൂറുദ്ദീന്‍ പയ്യോളി നന്ദിയും പറഞ്ഞു.