നിയമം കയ്യിലെടുത്ത് ഭീകരാന്തരീക്ഷം സൃഷ്ടിക്കുന്നവർക്കെതിരെ മുഖം നോക്കാതെ നടപടിയെടുക്കണം: ഇസ്ലാഹി സെന്റർ

നിയമം കയ്യിലെടുത്ത് ഭീകരാന്തരീക്ഷം സൃഷ്ടിക്കുന്നവർക്കെതിരെ മുഖം നോക്കാതെ നടപടിയെടുക്കണം: ഇസ്ലാഹി സെന്റർ യു ഏ ഇ

ദുബൈ: നിയമവും നിയമവാഴ്ചയും നിലനിൽക്കുന്ന നാട്ടിൽ നിയമം കയ്യിലെടുത്ത് അരാചകത്വം സൃഷ്ടിക്കുന്നവർക്കെതിരെ മുഖംനോക്കാതെ നടപടിയെടുക്കണമെന്ന് യു എ ഇ ഇസ്ലാഹി സെന്റർ ആവശ്യപ്പെട്ടു.

പ്രവാചകൻ (സ) യെ അപമാനിച്ച സമാധാനവും മതസൌഹാർദ്ദവും കാത്തുസൂക്ഷിക്കുന്നവർക്ക് പ്രതിഷേധമുണ്ട്. അക്രമങ്ങൾക്കും അവഹേളനങ്ങൾക്കും ചരിത്രത്തിൽ തുല്യതയില്ലാത്തവിധം മാപ്പുനൽകിയ ദൈവദൂതനാണ് മുഹമ്മദ് നബി (സ).

വിവാദപരാമർശം നടത്തിയ അധ്യാപകന്റെ കരഛേദം ചെയ്ത സംഭവം അങ്ങേയറ്റം അപലപനീയമാണെന്നും ഇസ്ലാഹി സെന്റർ യു എ ഇ പത്രക്കുറിപ്പിൽ അറിയിച്ചു.

അക്രമണം അപലപനീയം കുവൈത്ത് ഇസ്‌ലാഹി സെന്റർ

കുവൈത്ത് : ന്യൂമാൻ കോളേജ്‌ അധ്യാപകൻ ടി.കെ ജോസഫിനെതിരെയുണ്ടായ
ആക്രമണം അപലപനീയമാണെന്ന് കുവൈത്ത് ഇസ്‌ലാഹി സെന്റർ കേന്ദ്ര
സെക്രട്ടറിയേറ്റ് പ്രസ്‌താവിച്ചു.

പരീക്ഷാ ചോദ്യാവലിയിൽ നടത്തിയ ഇസ്‌ലാം നിന്ദയുടെ പേരിൽ നിയമ നടപടികൾ നേരിടുന്ന ഇയാൾക്കെതിരെ മതപോലീസ്‌ ചമഞ്ഞ് അക്രമം നടത്താൻ സമുദായം ആർക്കും ക്വട്ടേഷൻ നൽകിയിട്ടില്ല. തൽപര കക്ഷികൾ ഒരു സമുദായത്തെ മുൾമുനയിൽ നിറുത്തി പ്രശ്‌നത്തെ മുതലെടുക്കാൻ ശ്രമിക്കുന്ന സാഹചര്യം ഇല്ലായ്‌മചെയ്യാൻ അക്രമത്തിന്‌ പിന്നിൽ പ്രവർത്തിച്ചവരെ എത്രയും വേഗം നിയമത്തിന്‌ മുന്നിൽ കൊണ്ടുവരേണ്ടതുണ്ട്.

സാമുദായിക ധ്രുവീകരണത്തിന്‌ കാരണമാകുന്ന നിലപാടുകളിൽ നിന്ന് എല്ലാവരും വിട്ടുനിൽകണമെന്നും സെൻസിറ്റീവായ വിഷയത്തെ വിവേകപൂർവ്വം കൈകാര്യം ചെയ്യാൻ മത രാഷ്‌ട്രീയ നേതൃത്വങ്ങൾ പ്രത്യേക ശ്രദ്ധപതിപ്പിക്കേണ്ടതുണ്ടെന്നും യോഗം അഭ്യർത്ഥിച്ചു.