ദോഹ: സ്രഷ്ടാവായ ദൈവത്തിന്റെ നിയമനിര്‍ദേശങ്ങള്‍ ജീവിതത്തില്‍ കാത്തുസൂക്ഷിക്കാന്‍ വിശ്വാസിസമൂഹം തയ്യാറാവണമെന്ന് ഖത്തര്‍ ഇന്ത്യന്‍ ഇസ്ലാഹി സെന്റര്‍ പ്രസിഡന്റ് കെ.എന്‍. സുലൈമാന്‍ മദനി ആഹ്വാനംചെയ്തു. ഖത്തര്‍ മതകാര്യമന്ത്രാലയം മുംതസ അബൂബക്കര്‍ സിദ്ദിഖ് ഇന്‍ഡിപെന്‍ഡന്റ് സ്‌കൂളില്‍ സംഘടിപ്പിച്ച ഈദ്ഗാഹില്‍ ഖുതുബ പരിഭാഷ നിര്‍വഹിച്ച് സംസാരിക്കുകയായിരുന്നു അദ്ദേഹം. ഒരു മാസക്കാലമുള്ള വ്രതത്തിലൂടെ നേടിയെടുത്ത ആത്മചൈതന്യവും സൂക്ഷ്മതയും തുടര്‍ന്നുള്ള ജീവിതത്തില്‍ കാത്തുസൂക്ഷിക്കുമ്പോള്‍മാത്രമാണ് വ്രതത്തിലൂടെ ഇസ്‌ലാം വിഭാവനംചെയ്ത ഉദ്ദേശ്യലക്ഷ്യങ്ങള്‍ പൂര്‍ത്തീകരിക്കപ്പെടുകയുള്ളൂ. പ്രകൃതിമതമായ ഇസ്‌ലാമില്‍ ആഘോഷവേളകള്‍ ദൈവപ്രകീര്‍ത്തനങ്ങളുടെയും ദൈവാനുഗ്രഹങ്ങള്‍ക്ക് നന്ദികാണിക്കുന്നതിന്റെയും അവസരങ്ങളാണ്. സമൂഹത്തിലെ അശരണരും അഗതികളുമായവര്‍ക്കുള്ള ഭക്ഷണം അവരുടെ വീടുകളില്‍ എത്തിച്ചുകൊടുത്തതിനുശേഷമാണ് വിശ്വാസികള്‍ ഊദ്ഗാഹുകളിലേക്ക് പുറപ്പെടുന്നത്. സഹജീവികളോട് കരുണയും ആര്‍ദ്രതയുമില്ലാത്ത മനസ്സ് വിശ്വാസിയുടെതല്ല. ജീവകാരുണ്യപ്രവര്‍ത്തനങ്ങളില്‍ സജീവമായി പങ്കെടുക്കുകയും രോഗികളുടെയും അശരണരുടെയും പ്രയാസങ്ങള്‍ അകറ്റുന്നതില്‍ ആത്മാര്‍ഥമായി പ്രവര്‍ത്തിക്കുകയും വേണം.
അസൂയയും പകയും വിദ്വേഷവും അഹങ്കാരവും പൊങ്ങച്ചവുംപോലെയുള്ള എല്ലാവിധ ദുര്‍ഗുണങ്ങളില്‍നിന്നും മനസ്സിനെ സംസ്‌കരിച്ചെടുക്കുകയും സ്‌നേഹവും കാരുണ്യവും ദയയും സഹിഷ്ണുതയും നമ്മുടെ വികാരങ്ങളായി മാറുകയും വേണം. ആഘോഷങ്ങള്‍ ദൈവത്തോടുള്ള കടപ്പാടുകള്‍ നിര്‍വഹിക്കുന്നതോടൊപ്പം മനുഷ്യബന്ധങ്ങള്‍ ഊട്ടിയുറപ്പിക്കാന്‍കൂടി ഉപയോഗപ്പെടുത്തേണ്ടതുണ്ട്. കുടുംബസന്ദര്‍ശനങ്ങളിലൂടെയും അയല്‍പക്ക ബന്ധങ്ങളിലൂടെയും സുഹൃത്തുക്കളും സഹപ്രവര്‍ത്തകരുമായുള്ള സമ്പര്‍ക്കങ്ങളിലൂടെയും മനുഷ്യബന്ധങ്ങള്‍ ശക്തിപ്പെടുത്തുക. ഇസ്‌ലാമിന്റെ അതിര്‍വരമ്പുകള്‍ പാലിച്ചുകൊണ്ടുള്ള വിനോദങ്ങളില്‍ വിശ്വാസികള്‍ക്ക് പങ്കാളികളാകാം. നിഷിദ്ധമായ മാര്‍ഗത്തിലുള്ള ആഘോഷാഭാസങ്ങളില്‍നിന്ന് വിശ്വാസിസമൂഹം പൂര്‍ണമായും വിട്ടുനില്‍ക്കുകയും വേണം. ചെറുതും വലുതുമായ വിഷയങ്ങളില്‍ ഇസ്‌ലാമിന്റെ നിയമനിര്‍ദേശങ്ങള്‍ പാലിച്ചുകൊണ്ട് അല്ലാഹുവിനെ സൂക്ഷിക്കുന്നവരായി ജീവിക്കുമ്പോള്‍മാത്രമേ വ്രതാനുഷ്ഠാനത്തിന്റെ യഥാര്‍ഥലക്ഷ്യത്തിലേക്ക് നാം എത്തിച്ചേരുകയുള്ളു -അദ്ദേഹം വ്യക്തമാക്കി.
ഈദ് നമസ്‌കാരത്തിന് ശൈഖ് അബ്ദുല്‍ ബാസിത് ഉമരി നേതൃത്വംനല്‍കി. നമസ്‌കാരാനന്തരം ഈദ്ഗാഹില്‍ ഒരുമിച്ചു കൂടിയ സ്ത്രീകളടക്കമുള്ള ആയിരക്കണക്കിന് ആളുകള്‍ക്ക് ഇസ്‌ലാഹിസെന്റര്‍ പ്രവര്‍ത്തകര്‍ മധുരം വിതരണം ചെയ്തു.
0 വായനക്കാരുടെ പ്രതികരണങ്ങൾ :
Post a Comment
അസ്സലാമു അലൈക്കും...
സുഹൃത്തെ,
എഴുതൂ താങ്കളുടെ അഭിപ്രായങ്ങള്‍...
സ്നേഹത്തോടെ,
ടീം,
ഇസ്‌ലാഹിന്യൂസ്.കോം