ഫോക്കസ് ജിദ്ദ വൃക്കരോഗ ബോധവത്കരണ ക്യാമ്പയിന്‍ സംഘടിപ്പിക്കുന്നു

ജിദ്ദ: വൃക്ക രോഗത്തെ തുടക്കത്തിലേ കണ്ടെത്തി നിയന്ത്രിക്കുന്നതിന് ഫോക്കസ് ജിദ്ദയുടെ ആഭിമുഖ്യത്തില്‍ ബോധവല്‍ക്കരണ കാമ്പയിനും സൗജന്യ വൃക്കരോഗ നിര്‍ണ്ണയ മെഡിക്കല്‍ ക്യാമ്പുകളും സംഘടിപ്പിക്കുന്നതായി ഭാരവാഹികള്‍ പത്രസമ്മേളനത്തില്‍ അറിയിച്ചു. അല്‍ അബീറ് മെഡിക്കല്‍ ഗ്രൂപ്പുമായി സഹകരിച്ചാണ് കിഡ്‌നി ഏര്‍ളി ഇവാല്യവേഷന്‍ (Kidney Early Evaluation - KEE) എന്ന കര്‍മ്മപദ്ധതി സംഘടിപ്പിക്കുക. കാമ്പയിനിന്റെ ഔപചാരിക ഉദ്ഘാടനം 2011 ഒക്ടോബര്‍  21 ന് വെള്ളിയാഴ്ച വൈകുന്നേരം ജിദ്ദ ഇന്ത്യന്‍ കോണ്‍സുലേറ്റ് അങ്കണത്തില്‍ നടക്കും. പ്രാരംഭ ഘട്ടത്തിലേ തിരിച്ചറിഞ്ഞാല്‍ വൃക്കരോഗം പൂര്‍ണ്ണമായും ചികിത്സിച്ച് ഭേദമാക്കാം. കുറഞ്ഞ ചെലവില്‍ ഇത് സാധ്യവുമാണ്. വൃക്കരോഗത്തെ തുടക്കത്തിലേ തിരിച്ചറിയാന്‍ ശരിയായ ബോധവത്കരണത്തിലൂടെ സാധിക്കും. ഫോക്കസ് ഒരുക്കുന്ന കാമ്പയിനില്‍ ഒരു വര്‍ഷത്തോളം നീണ്ടു നില്‍ക്കുന്ന ബോധവത്ക്കരണ പരിപാടികളും ജിദ്ദയുടെ വിവിധ ഭാഗങ്ങളില്‍ സൗജന്യ വൃക്കരോഗ നിര്‍ണ്ണയ മെഡിക്കല്‍ ക്യാമ്പുകളും നടത്തും. കൂടാതെ, ലഘുലേഖ വിതരണം, വീഡിയോ പ്രദര്‍ശനം തുടങ്ങിയവയും സഘടിപ്പിക്കും. ജിദ്ദയിലെ മുഴുവന്‍ പ്രവാസികളെയും ഈ ഒരു വര്‍ഷക്കാലയളവിനുള്ളില്‍ പരിശോധനക്ക് വിധേയമാക്കുകയാണ് ലക്ഷ്യം. വൃക്കരോഗത്തെക്കുറിച്ച് വിവരങ്ങള്‍ നല്‍കുന്നതിന് www.saveyourkidney.org എന്ന വെബ്‌സൈറ്റും തയ്യാറാക്കിയിട്ടുണ്ട്. അതോടൊപ്പം തന്നെ saveyourkidney എന്ന പേരില്‍ ഫേസ്ബുക്ക് പേജും തയ്യാറാക്കും. ജിദ്ദയിലെ സാധാരണക്കാരായ പ്രവാസികള്‍ക്ക് അല്‍ അബീര്‍ ഗ്രൂപ്പിന്റെ കീഴിലുള്ള വിവിധ ആശുപത്രികളില്‍ ആറ് മാസ കാലയളവിനുള്ളില്‍ സൗജന്യമായി വൃക്കരോഗ സ്‌ക്രീനിങ്ങ് നടത്താനുള്ള സംവിധാനം ഒരുക്കും. തുടര്‍ വിദ്യാഭ്യാസ ബോധവല്ക്കരണ പരിപടികളും സംഘടിപ്പിക്കും.ഓണ്‍ലൈന്‍ വഴി രജിസ്റ്റര്‍ ചെയ്ത എല്ലാവര്‍ക്കും സഹായഹസ്തം നീട്ടാന്‍ അല്‍ -അബീര്‍ പോളിക്ലിനിക്കുകള്‍ തയ്യാറാണെന്ന് അല്‍ -അബീര്‍ ഗ്രൂപ്പ് സി.ഇ.ഒ മുഹമ്മദ് ആലുങ്കല്‍ അറിയിച്ചു. 2030 ആവുമ്പോഴേക്കും ഇന്ത്യ ഡയബറ്റിക് ക്യാപിറ്റല്‍ ആയി മാറുമെന്നും 75% വൃക്കരോഗങ്ങള്‍ക്കും അടിസ്ഥാനകാരണമാവുന്നത് പ്രമേഹവും രക്തസമ്മര്‍ദ്ദവുമാണെന്നും ഫോക്കസ് ജിദ്ദ സി.ഇ.ഒ പ്രിന്‍സാദ് പയ്യാനക്കല്‍ പറഞ്ഞു. 

ഖത്തര്‍, യു എ ഇ, റിയാദ് എന്നിവിടങ്ങളിലും ഫോക്കസ് കമ്മിറ്റികളുടെ ആഭിമുഖ്യത്തില്‍ ക്യാമ്പയിന്‍ ആരംഭിക്കും. കേരളത്തില്‍ പത്തോളം ജില്ലാ കേന്ദ്രങ്ങളെ കൂട്ടിയിണക്കി കൊണ്ട് മൊബൈല്‍ ഡയഗനോസ്റ്റിക് ലാബുകള്‍ ഉള്‍ക്കൊള്ളുന്ന ഐ.എസ്.എം മെഡിക്കല്‍ കെയറിന്റെ ആഭിമുഖ്യത്തില്‍ സ്‌പോട്ട് കിഡ്‌നി പ്രോഗ്രാം എന്ന പദ്ധതിയുടെ പൈലറ്റ് ക്യാമ്പുകള്‍ കോഴിക്കോട് മലപ്പുറം ജില്ലകളില്‍ നടന്നു കഴിഞ്ഞു. ഇത്തരം ബോധവല്‍ക്കരണ പരിപാടികള്‍ എറ്റെടുക്കുന്നതിന് കൂടുതല്‍ സന്നദ്ധ സംഘടനകള്‍ മുന്നോട്ട് വരണമെന്ന് ഭാരവാഹികള്‍ അഭ്യര്‍ത്ഥിച്ചു. ഒക്ടോബര്‍ 21നു നടക്കുന്ന സൌജന്യ വൃക്കരോഗ നിര്‍ണ്ണയ മെഡിക്കല്‍ ക്യാമ്പില്‍ പങ്കെടുക്കാന്‍ ആഗ്രഹിക്കുന്നവര്‍ 0556519374, 0553914145, 0564413527, 0507163883 എന്നീ നമ്പറുകളില്‍ വിളിച്ച് രജിസ്റ്റര്‍ ചെയ്യണം. അല്‍ അബീര്‍ ഗ്രൂപ്പിനെ പ്രതിനിധീകരിച്ച് സി.ഇ.ഒ മുഹമ്മദ് ആലുങ്കല്‍, മാര്‍ക്കറ്റിങ്ങ് മാനേജര് ഇമ്രാന്‍, തുടങ്ങിയവരും ഫോക്കസ് ജിദ്ദയെ പ്രതിനിധീകരിച്ച് സി.ഇ.ഒ പ്രിന്‍സാദ് പയ്യാനക്കല്‍, മറ്റ് ഡിപ്പാര്‍ട്ട്‌മെന്റ് മാനേജര്‍മാരായ മുബഷിര്‍, സി.എച്ച് ജലീല്‍. ഷക്കീല്‍ ബാബു, മുബാറക്ക്, ഷിനൂണ്‍ ബക്കര്‍ എന്നിവരും ഫോക്കസ് ജിദ്ദയുടെ ഉപദേശക സമിതി അംഗങ്ങളായ ബഷീര്‍ വള്ളിക്കുന്ന്, സലാഹ് കാരാടന്‍ തുടങ്ങിയവരും പത്രസമ്മേളനത്തില്‍ പങ്കെടുത്തു.