എം ജി എം സില്‍വര്‍ ജൂബിലി പ്രഖ്യാപന സമ്മേളനം നാളെ കൊടുങ്ങല്ലൂരില്‍

കൊടുങ്ങല്ലൂര്‍ : സാമൂഹ്യ നവോത്ഥാനത്തിന് സ്ത്രീ മുന്നേറ്റം എന്ന പ്രമേയവുമായി എം ജി എം നടത്തുന്ന സില്‍വര്‍ ജൂബിലി പരിപാടികളുടെ പ്രഖ്യാപന സമ്മേളനം നാളെ 2011 ഒക്ടോബര്‍ 26നു കൊടുങ്ങല്ലൂര്‍ ടൗണ്‍ഹാളില്‍ നടക്കും. രാവിലെ 9.30ന് മുസ്‌ലിം പേഴ്‌സണല്‍ ലോ ബോര്‍ഡ് അംഗം ഡോ. റുക്‌സാന ലാരി ലക്‌നൗ ഉദ്ഘാടനം ചെയ്യും. എം ജി എം സംസ്ഥാന പ്രസിഡന്റ് ഖദീജ നര്‍ഗീസ് അധ്യക്ഷത വഹിക്കും. ടി എന്‍ പ്രതാപന്‍ എം എല്‍ എ മുഖ്യാതിഥിയായിരിക്കും. കെ എ അബ്ദുല്‍ ഹസീബ് മദനി മുഖ്യപ്രഭാഷണം നടത്തും. കൊടുങ്ങല്ലൂര്‍ നഗരസഭ ചെയര്‍പേഴ്‌സണ്‍ സുമ ശിവന്‍, കെ അബ്ദുസ്സലാം മാസ്റ്റര്‍, ഇ ഐ മുജീബ്, പി എം നസീഫ് തുടങ്ങിയവര്‍ പ്രസംഗിക്കും. 11.30ന് നടക്കുന്ന പഠന സെഷനില്‍ എം ജി എം വൈസ് പ്രസിഡന്റ് കുഞ്ഞീവി ടീച്ചര്‍ അധ്യക്ഷത വഹിക്കും. 'അന്ധവിശ്വാസങ്ങള്‍ക്കെതിരെ സ്ത്രീജാഗ്രത' എന്ന വിഷയത്തില്‍ എ ജമീല ടീച്ചര്‍, 'ഉത്തമ സ്ത്രീ ഉത്കൃഷ്ട സമൂഹം' എന്ന വിഷയത്തില്‍ ഷഫീഖ് അസ്‌ലം എന്നിവര്‍ ക്ലാസ്സെടുക്കും. 

രണ്ട് മണിക്ക് നടക്കുന്ന പഠന സെഷനില്‍ എം ജി എം വൈസ് പ്രസിഡന്റ് സൈനബ ശറഫിയ്യ അധ്യയായിരിക്കും. തുടര്‍ന്ന് 'വനിതാ വിമോചനം: ഇസ്‌ലാമിക സമീപനം' എന്ന വിഷയത്തില്‍ നൂറുന്നീസ നജാത്തിയ, 'എം ജി എം: പെണ്‍ ഉണര്‍വിന്റെ കാല്‍ നൂറ്റാണ്ട്' എന്ന വിഷയത്തില്‍ സി ടി ആഇശ കണ്ണൂര്‍, 'കേരള നവോത്ഥാനവും മുസ്‌ലിം സ്ത്രീകളും' എന്ന വിഷയത്തില്‍ പി എം എ ഗഫൂര്‍ എന്നിവര്‍ ക്ലാസ്സുകള്‍ നയിക്കും. സില്‍വര്‍ ജൂബിലി പ്രഖ്യാപനത്തില്‍ എം ജി എം വൈസ് പ്രസിഡന്റ് ബുഷ്‌റ നജാത്തിയ അധ്യക്ഷത വഹിക്കും. കെ എന്‍ എം ജന.സെക്രട്ടറി സി പി ഉമര്‍ സുല്ലമി സമ്മേളന പ്രഖ്യാപനം നടത്തും. എ അസ്ഗറലി, എന്‍ എം അബ്ദുല്‍ ജലീല്‍, വി കെ ആസിഫലി, ശാക്കിറ വാഴക്കാട് എന്നിവര്‍ പ്രസംഗിക്കും. എം ജി എം ജനറല്‍ സെക്രട്ടറി ഷമീമ ഇസ്വ്‌ലാഹിയ്യ സമാപന പ്രസംഗം നടത്തും. അയല്‍ കൂട്ടം, സ്ത്രീ സുരക്ഷാ സംഗമങ്ങള്‍, പഞ്ചായത്ത്-മണ്ഡലം പഠനക്യാംപ്, സെമിനാറുകള്‍, ഗൃഹസമ്പര്‍ക്കം തുടങ്ങി നിരവധി പരിപാടികള്‍ സില്‍വര്‍ ജൂബിലിയുടെ ഭാഗമായി എം ജി എം സംസ്ഥാനത്തെങ്ങും സംഘടിപ്പിക്കുന്നുണ്ട്.

സമ്മേളനം തത്സമയം കാണാൻ www.islahiclassroom.com എന്ന സൈറ്റ് സന്ദർശിക്കുക...