ദോഹ: സുപ്രീം ആരോഗ്യകൗണ്‍സിലിന്റെ ലോക തൊഴിലാളിസുരക്ഷാദിനാചരണത്തിന്റെ ഭാഗമായി റെഡിമിക്‌സ് ഖത്തര്‍ എല്‍.എല്‍.സി.യുമായി സഹകരിച്ച് ഫോക്കസ് ഖത്തര്‍ സംഘടിപ്പിച്ച മെഡിക്കല്‍ ക്യാമ്പില്‍ വിവിധ രാജ്യങ്ങളില്‍നിന്നായി ആയിരത്തോളം തൊഴിലാളികള്‍ പങ്കെടുത്തു. പൊതുജനാരോഗ്യ വകുപ്പ് ഡയറക്ടര്‍ ഡോ. മുഹമ്മദ് അല്‍താനി ഉദ്ഘാടനം ചെയ്തു. ഇന്ത്യ, നേപ്പാള്‍, ബംഗ്ലാദേശ് എന്നീ രാജ്യങ്ങളില്‍ നിന്നുള്ള അംബാസഡര്‍മാരും വിവിധമന്ത്രാലയങ്ങളിലെ പ്രതിനിധികളും പങ്കെടുത്തു.
രാജ്യത്തിന്റെ നിര്‍മാണത്തില്‍ പങ്കുവഹിക്കുന്ന തൊഴിലാളികളെ ആദരിക്കുന്നതോടൊപ്പം അവരുടെ സുരക്ഷയും ആരോഗ്യയും ഉറപ്പുവരുത്തണമെന്ന് ഡോ. മുഹമ്മദ് അല്‍ത്താനി പറഞ്ഞു. ഇത്തരം ക്യാമ്പുകള്‍ വര്‍ഷത്തില്‍ ഇടയ്ക്കിടെ നടത്താനുള്ള പദ്ധതികള്‍ ആവിഷ്‌കരിച്ചുവരുന്നുണ്ട്. ഫോക്കസ് ഖത്തര്‍പോലെയുള്ള സന്നദ്ധസംഘടനയുടെ സാന്നിധ്യം ക്യാമ്പിന്റെ വിജയത്തിന് സഹായകമാകുന്നു-അല്‍ത്താനി പറഞ്ഞു.
ഉച്ചയ്ക്ക് 1.30ന് രജിസ്‌ട്രേഷന്‍ ആരംഭിച്ചതുമുതല്‍ അബൂ ഹമൂറിലെ മെഡിക്കല്‍കമ്മീഷന്‍ ഒരു താത്കാലിക ആതുരാലയമായി മാറുകയായിരുന്നു. വിവിധ രാജ്യങ്ങളില്‍നിന്നുള്ള ആയിരത്തോളം തൊഴിലാളികളെ പരിശോധിക്കുന്നതിനുവേണ്ടി 40 ഡോക്ടര്‍മാരും 50 നഴ്‌സുമാരും 10 ഫാര്‍മസിസ്റ്റുകളും ഉള്‍പ്പെടെ മെഡിക്കല്‍ ടീം സുസജ്ജമായിരുന്നു. എല്ലാ തൊഴിലാളികളും പ്രാഥമികപരിശോധനയ്ക്കുശേഷം ജനറല്‍ മെഡിസിന്‍, നേത്ര, ഡെന്റല്‍ വിഭാഗങ്ങളിലെ പരിശോധനയ്ക്ക് വിധേയമായി. പ്രത്യേകം തയ്യാറാക്കിയ ഫാര്‍മസിയില്‍ വെച്ച് സൗജന്യ മരുന്നുവിതരണവും നടന്നു. അതിനുശേഷം താത്കാലിക ടെന്റില്‍ വിവിധ ഭാഷകളിലായി നടന്ന ആരോഗ്യ-സുരക്ഷാ ബോധവത്കരണക്ലാസുകളില്‍ തൊഴിലാളികള്‍ പങ്കെടുത്തു. വൈകിട്ട് ആറിന് സിവില്‍ ഡിഫന്‍സ് നടത്തിയ ഫയര്‍ ഡ്രില്‍ തൊഴിലാളികള്‍ക്ക് നവ്യാനുഭവമായി. തുടര്‍ന്ന് സമ്മാനങ്ങളും രാത്രി ഭക്ഷണവുമുണ്ടായി.
ഫോക്കസ് ഖത്തറിന്റെ നൂറോളം വളണ്ടിയര്‍മാര്‍ പരിപാടിയില്‍ സേവനമനുഷ്ഠിച്ചു. ഖത്തറിന്റെ പുരോഗതിയില്‍ സഹായിക്കുന്ന തൊഴിലാളികളെ അധികാരികള്‍ ശ്രദ്ധിക്കുന്നുവെന്നത് സന്തോഷകരമായ കാര്യമാണ്. അപകടകരവും ദുഷ്‌കരവുമായ തൊഴിലുകളില്‍ ഏര്‍പ്പെടുന്ന എല്ലാവരും സുരക്ഷാ നടപടികള്‍ മനസ്സിലാക്കുകയും പ്രാവര്‍ത്തികമാക്കുകയും ചെയ്യണമെന്ന് ഇന്ത്യന്‍ അംബാസഡര്‍ ദീപ ഗോപാലന്‍ വാധ്വ സദസ്സിനെ ഉണര്‍ത്തി.
നേപ്പാള്‍ അംബാസഡര്‍ ഡോ. സൂര്യനാഥ് മിശ്ര, ബംഗ്ലാദേശ് അംബാസഡര്‍ ശഹ്ദത്ത് ഹുസൈന്‍ എന്നിവര്‍ ഖത്തര്‍ ഗവണ്‍മെന്റിന്റെ ഇത്തരം പ്രവര്‍ത്തനങ്ങളില്‍ സന്തോഷം പ്രകടിപ്പിക്കുകയും തൊഴിലാളികളോട് അവരുടെ മാതൃഭാഷയില്‍ സുരക്ഷാനടപടികള്‍ ജീവിതത്തിന്റെ ഭാഗമാക്കി മാറ്റാന്‍ നിര്‍ദേശിക്കുകയും ചെയ്തു.
ലേബര്‍വിഭാഗത്തിന്റെ പ്രത്യേക കൗണ്ടര്‍ തൊഴിലാളികള്‍ക്ക് പ്രശ്‌നപരിഹാരത്തിനുള്ള വേദിയായി മാറി. ഖത്തര്‍ ഡയബറ്റിക് അസോസിയേഷന്റെ പ്രത്യേകം സ്റ്റാള്‍ പ്രമേഹരോഗം തടയാനുള്ള മാര്‍ഗനിര്‍ദേശങ്ങള്‍ നല്‍കി.
ഖത്തര്‍ റെഡിമിക്‌സ് ജനറല്‍ മാനേജര്‍ ആന്‍സി പെയ്‌ലര്‍, ഖത്തര്‍ ഡയബറ്റിക് അസോസിയേഷന്‍ എക്‌സിക്യുട്ടീവ് ഡയറക്ടര്‍ ഡോ. അബ്ദുല്ല അല്‍ഹമഖ് എന്നിവര്‍ സംസാരിച്ചു. ഫോക്കസ് ഖത്തര്‍ ഹെല്‍ത്ത് കെയര്‍ ഡിപ്പാര്‍ട്ടുമെന്റ് മാനേജര്‍ ഡോ. നിഷാന്‍ നന്ദി പറഞ്ഞു.
0 വായനക്കാരുടെ പ്രതികരണങ്ങൾ :
Post a Comment
അസ്സലാമു അലൈക്കും...
സുഹൃത്തെ,
എഴുതൂ താങ്കളുടെ അഭിപ്രായങ്ങള്‍...
സ്നേഹത്തോടെ,
ടീം,
ഇസ്‌ലാഹിന്യൂസ്.കോം