പ്രകൃതിസ്നേഹ സംഗമം

ദുബൈ: പരിസ്ഥിതിയുമായി താദാത്മ്യം പ്രാപിച്ചുകൊണ്ടുള്ള വികസനപാതയിലൂടെയാണ് ദുബൈ മുന്നേറുതെന്ന് ദുബൈ മുനിസിപ്പാലിറ്റി നഴ്സറീസ് ഡിപാർട്ടുമെന്റ് മേധാവി ഹന അമീൻ അൽസറൂനി പ്രസ്താവിച്ചു. ദുബൈ മുനിസിപ്പാലിറ്റിയുടെ ആഭിമുഖ്യത്തിൽ എമിറേറ്റ്സ്  ഇന്ത്യ എൻ‌വയർമെന്റ്  ഫോറം സംഘടിപ്പിച്ച പ്രകൃതി സ്‌നേഹസംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അവർ. ഹരിതശോഭ കാത്തുസൂക്ഷിക്കാൻ ദുബൈ പ്രതിജ്ഞാബദ്ധമാണെന്നും ഭൂഗോളത്തിന്റെ നിലനിൽപിനെ അപകടപ്പെടുത്തിക്കൊണ്ടിരിക്കുന്ന വനനശീകരണത്തിനെതിരെ മനുഷ്യസമൂഹം ഉണർന്നുപ്രവർത്തിക്കണമെന്നു ഹന അമീൻ  ആവശ്യപ്പെട്ടു. മരം നടുക, ഒരിലയെ തലോടുക എന്ന പ്രമേയത്തിൽ മുനിസിപ്പാലിറ്റി ഓഡിറ്റോറിയത്തിൽ നടന്ന സംഗമത്തിൽ വി പി അഹ്മദ്കുട്ടി മദനി അധ്യക്ഷത വഹിച്ചു.

ജീവന്റെ നിലനില്പിന് അടിസ്ഥാനഘടകങ്ങളായ വായു, ശൂദ്ധജലം, മണ്ണ് എന്നിവയെ ആരോഗ്യകരമായി നിലനിർത്തുന്നത് മരങ്ങളാണെന്ന് സമ്മേളനത്തിൽ പ്രബന്ധമവതരിപ്പിച്ചവർ ചൂണ്ടിക്കാട്ടി. അന്തരീക്ഷത്തിൽ ഓക്സിജൻ നിലനിർത്തുന്നതും പ്രകൃതിയിലെ ജലചംക്രമണം നിയന്ത്രിക്കുന്നതും മണ്ണിനെ പ്രത്യുല്പാദനപരമാക്കുന്നതും മരങ്ങളാണ്. എന്നാൽ ലോകത്തെ സംരക്ഷിതവനങ്ങളും മഴക്കാടുകളും പ്രതിവർഷം 16 മില്യൻ ഹെക്ടർ എന്ന തോതിൽ നശിച്ചുകൊണ്ടിരിക്കുന്നു. മഴക്കാടുകളുടെ നാശം ജൈവ വൈവിത്തെയും അന്തരീക്ഷത്തിലെ ഓക്‌സിജൻ സാന്നിധ്യത്തെയും പ്രതികൂലമായി ബാധിക്കുന്നു. ആധുനികലോകം നേരിടുന്ന ശുദ്ധജല ക്ഷാമത്തിന്റെ പ്രഥമ കാരണം മരുവത്കരണമാണെുന്നും നാടിന്റെ വന-ജല സമ്പത്തുകൾ സംരക്ഷിക്കാൻ പ്രവാസി സമൂഹം ക്രിയാത്മക പങ്കുവഹിക്കണമെന്നും സമ്മേളനം ആവശ്യപ്പെട്ടു.

ദുബൈ മുനിസിപ്പാലിറ്റി എൺ‌വയർമെന്റ് ഡിപ്പാർട്ടുമെന്റ് ഓഫീസർ ഖാലിദ് സലീം സിലൈത്വീൻ, ഇന്ത്യൻ കോൺസുലേറ്റ് വൈസ് കോൺസുൽ ബി എൻ തോമസ്, ഐ എസ് എം പ്രസിഡന്റ് മുജീബുർറഹ്മാൻ കിനാലൂർ, ഫൈസൽ ബാവ, ശഹീൻ അലി, ഹാറൂൺ കക്കാട്  പ്രസംഗിച്ചു.

ഹ്രസ്വ സിനിമാ-ചിത്രപ്രദർശനം, ഫോട്ടോ സെഷൻ എന്നിവ സംഗമത്തിന്റെ ഭാഗമായി സംഘടിപ്പിച്ചു.